「蘿蔔糕」虛構故事

話說主人公「楊過肥」無發市幾個月，諗住舊曆年前有隻老狐狸叫佢幫手揸莊，執番少少啦。一去到間野，離奇無比，無銀兩又無管理，直情係「黑店」。楊過肥心想「唉！中伏了。」佢本想坤間黑店一個月洗費（其實係簽咗生死約最少一個月知會啫），不過，楊過肥都係太有良心，無謂久留。加想佢太座「小聾女」無喇喇話要食「蘿蔔糕」。

因為兩年無食過楊過肥整的蘿蔔糕喎（註：其實楊過肥並唔係整得太好食架）。楊過肥思前想後，諗下諗下，又好似好耐無整過，再諗，楊過肥掛住練「黯然銷魂飯」武功都廿幾年，都無正正式式放下所有事情，陪伴小聾女周圍玩樂（相識時當然要呃呃氹氹，練玉女心經啦）。楊過肥再諗諗，不得了，原來兩條友不出幾年已年近半百，所以，唔知大家幾時到達終點站嘛。

楊過肥就用了「我要返去整『蘿蔔糕』畀小聾女食」為藉口，閃離黑店了。

楊過肥其實心想，就快近半百了，要在行得走得的時候，兌現多年對小聾女的承諾，最少也放下無謂事，陪下小聾女周圍逛逛。做下短暫的神仙快侶呵呵。

唔知結婚多年的朋友，其實有無對身邊人期許太多，兌現太少呢？唔好到一方就快到終點站才去兌現承諾呀。